Chief Minister chuan, kan chhak lam ram thenkhatte khi khawvel hriata ruihhlo bupui, Golden Triangle an tih thin an ni a, chuta tanga ruihhlo lo chhuk thlakna kawngpuiah chuan kan awm avangin hun rei tak ruihhlo hian min chim buai tawh. "Keinin thapui thawhin lo do mah ila kan thenawm ramten an beih ve si loh avangin kan mal tan a, a sawt mawh hle," a ti.

"Supply a tam avangin a man a tlawm a, kan thalai tam takten a ngawl an lo vei phah a. Sawrkarna kan chan ve leh a theih ang angin beihpui kan thlak nghal a ni. Mitin huapa do ngai anih avangin kohhran hrang hrang leh tlawmngaipawlte, kan ram mipui zawng zawng te hi thawhpuiah kan sawm a ni," Chief Minister chuan a ti.

"Kan fate drug laka an him theih nan hian chhungkua kan pawimawh hle a, nu leh paten kan fate thlithlai taima ila, nun kawng dik an zawhna tur a nih phawt chuan khauh taka khuahkhirh hi i hreh lovang u. Chu chu Pathian pawhin a phal a ni," a ti bawk.

Lalrinpuii, Health Minister leh Lalnghinglova Hmar, Excise Minister te pawhin thu an sawi a, Prof. Lalnuntluanga, Vice President Central YMA chuan YMA in hma a lo lak tawh dan tlangpui report a pe.

Sorkar thuchhuahin a tarlan danin, he In khawm hi Dr. Renu Sharma, Chief Secretary in a kaihruaia, Lalthansanga, Minister, Prof. Lalnilawma, Minister of State, Lalmuanpuia Punte, Adviser to CM, Lt. Col. Clement Lalhmingthanga leh Prova Chakma, MLA, sawrkar official, tlawmngaipawl, kohhran aiawh leh zirlai naupang te an tel a ni.

He ni hi UN General Assembly in kum 1987 December thlaa Resolution a pass anga khawvel puma hman zui tak a ni a. Kumin thupui hi "Kan dinhmun a chiang e, Invenna kawngah tan ila ang u" tih a ni.